Rěčny centrum WITAJ zwěsća znowa rěčne kmanosće

Budyšin (SN/MiR). Rěčny centrum WITAJ (RCW) přeprošuje tež lětsa zaso zajimowanych dorosćenych, swoje znajomosće hornjoserbšćiny abo delnjoserbšćiny po zhromadnym europskim referencnym ramiku za rěče (GER) certifikować dać. Tónle kónc tydźenja pruwuja w Budyskim Serbskim domje tych, kotřiž chcedźa swoje rěčne kmanosće hornjoserbšćiny dopokazać. „Sobotu startujemy z třomi wosobami na niwowje A2. W běhu lěta poskićamy potom dalše pruwowanja na niwowach A1 do C1“, rjekny wědomostna sobudźěłaćerka Budyskeho RCW Jadwiga Kaulfürstowa, kotraž testy ze swojim kolegu dr. Kryštofom Peršínom přewjeduje. Pruwowanja delnjoserbšćiny, tohorunja na schodźenkach A1 do C1, ma jeju kolega Aleksander Draguła w Choćebuzu na starosći. Dalše informacije kaž tež přikładowe pruwowanja za zwučowanje a móžnosć so přizjewić su w interneće na stronje www.sprachzertifikat-sorbisch.de wozjewjene.