Gmejna zhubi wažnu móžnosć spěchowanja přez Zwjazk

Slepo (AK/SN). Minjene měsacy z wjele prócu zdźěłany koncept wo škiće klimy w Slepjanskej gmejnje njeje gmejnska rada na swojim posedźenju wutoru schwaliła. Sydom radźićelow hłosowaše za koncept, runje telko bě přećiwo njemu, jedyn radźićel so hłosa wzda. „Z tym zhubimy šansu. Wot Zwjazka bychmy 140 000 eurow spěchowanja za městno managera za škit klimy za přichodne tři lěta dóstać móhli. Spěchowanje by 60 procentow wučiniło. Tole nětko zhubimy“, rjekny wjesnjanosta Jörg Funda (CDU).