Budyšin (CS/SN). Je wjele koparskich mudrosćow, kaž „Kulojte dyrbi do róžkateho“. Ede Geyer a Ralf Minge, legendarnaj wuchodoněmskaj koparjej, staj tomu pjatk w Budyskej „Krónje“ někotre ze swojich žiwjenskich wěrnosćow přidałoj. Něhdźe 400 wopytowarjow je na zarjadowanje „Dobbelpass“ přišło, hdźež so zhromadnje na „stare časy“ kopańcy dopominachu. Tež moderator Thomas Veit je z časa NDR jako sportowy reporter znaty.

Ede Geyer a Ralf Minge mataj dołhu sportowu biografiju. Ale tež wonaj staj małaj započałoj. Jako młodaj mužej běštaj so w praktiskim dźěle wupruwowałoj. Geyer so dopominaše, zo je w prózdninach mjez druhim jako pinčnik a transportowy dźěłaćer skutkował. Tajke nazhonjenja tež swojim wnučkam přeje. Ralf Minge, kotryž je najprjedy w Gröditzu kopańcu hrał, je tam tež we woclowni dźěłał. To mjenowaše wón dobru šulu za žiwjenje, přetož tajke dźěło sylni wolu čłowjeka a jeho charakter.