Brězowka (AK/SN). Mjez Brězowku a Dźěwinom ma na 39 hektarow wulkej płoninje fotowoltaikowa připrawa ze składom miliny a z přepinarnju nastać. Mužakowska firma ToRa chce připrawu zhromadnje ze šwicarskim předewzaćom MET natwarić. Za to je Dźěwinska gmejnska rada na swojim zašłym posedźenju zelenu swěcu dała a mjez druhim wotpowědne wustawki za twarski plan wobzamknyła. „We wuběrkach smy wjackróć wo tym rěčeli“, praji wjesnjanosta Sebastian Bertko (njestronjan).
Na internetnej stronje gmejny projekt bliže wopisuja. Hižo wot lěta 2023 předewzaće ToRa twarski plan wuwiwa. Dźěwinska gmejnska rada bě jemu w decembru 2023 přihłosowała. W juliju a awgusće 2024 běchu podłožki prěni raz zjawnje wupołožene. W nowembru 2024 su připrawu wobydlerjam na informaciskim wječoru předstajili.
