Twórby zjednoćeja wuměłsku hódnotu a rjemjeslnisku kwalitu

Wojerecy (ni/SN). Swoju zběrku wuměłskich twórbow stej Wojerowski hród a tamniši měšćanski muzej njedawno na wosebite wašnje rozšěriłoj. Bywši wyši měšćanosta Stefan Skora přepoda muzejej wjacore wobrazy ze swojeho swójbneho wobsydstwa. Dar wopřija 16 zaramikowanych akwarelow wuměłca a bywšeho direktora měšćanskeho muzeja Güntera Petersa kaž tež wolijowu mólbu Ernsta Janetzkeho. Twórby zwobraznjeja we wulkej ličbje motiwy z měšćanskeho žiwjenja. Kaž wědomostna přistajena muzeja Boglárka Ilona Szücs zdźěli, su wobrazy drohotne wobohaćenje wuměłskich a měšćanskostawizniskich zběrkow muzeja.

Wosebity wuznam maja při tym tež ramiki jednotliwych akwarelow. To su wušikne rjemjeslniske dźěła blidarskeho mištra Huberta Skory, nana darićela Stefana Skory. Jednotliwe twórby zjednoćeja tuž wuměłski wuraz, stawizny města, rjemjeslnisku kwalitu a wosobinske swójbne stawizny.