Na 2. intensiwny rěčny kurs we Wulkich Zdźarach witaja 11 zwólniwych

Budyšin (SN/jp). Kak wuspěšny je intensiwny rěčny program „domoj“ we Wulkich Zdźarach? Julian Nyča, zamołwity za rěčne kubłanje w Syći za serbsku rěč a regionalnu identitu (Zari), bě wčera na nowinsku rozmołwu do Serbskeho domu přeprosył, zo by wo aktualnym stawje informował. Serbske a němske medije su přichwatali, wšako zjawnosć zajimuje, hač a kak wožiwjenje serbšćiny a zdobywanje nowych serbowacych funguje. 13. apryla startuje zaso dźewjeć měsacow trajacy intensiwny rěčny kurs, kiž so druhi raz pod režiju Zari w nošerstwje Domowiny přewjeduje. Zaměrowa skupina su ludźo, kotřiž chcedźa sej serbšćinu přiswojić abo so rěčnje wukmanić.