Kača Korčma (SN/MWj). Drje jedne z najswojoraznišich wjesnych mjenow Hornjeje Łužicy ma Kača Korčma w Rakečanskej gmejnje. Wjes z dobrymi 30 woby­dle­rjemi ma swoje pomjenowanje wot hosćenca, kiž bě tam wjele lětdźesatkow k zawinjenju přeprošował. Tule składnosć njejsu jenož často kolesowarjo wužiwali, kotřiž při jězbje podłu Rakečanskich ­hatow za čerstwym napojom žadachu. Tež swójbne a towarstwowe swjedźenje su so tam wotměwali. Regularne wotewrjenske časy wšak hosćenc dawno hižo ­nima. Na swjedźenju Božeho spěća, hdyž su předewšěm mužojo z kolesom po ­puću, pak w Kačej Korčmje rady hosći ­witaja.