Towarstwo Kamjenjak zarjaduje we wsy galeriju

Njebjelčicy (SN/MiR). Wjacore lěta hižo planuja čłonojo Njebjelčanskeho wuměłsko-kubłanskeho towarstwa Kamjenjak wutworjenje galerije pod krutej třěchu. Ideja bywa nětko konkretna. Na Lipowym puću 6a/b, za wrotami hródźe, w kotrejž běchu něhdy kruwy stali, wotewru srjedu, 29. apryla, wustajeńcu. „Wo čimž smy dołho rozmyslowali, dóstawa nětko sćěny, swěcu a hłosy“, wujasnja předsyda towarstwa Hubert Lange w nowinskej zdźělence a přeprošuje na swjatočne wotewrjenje noweje galerije. Loni běše horstka čłonow towarstwa, kotremuž tež młódši ludźo přisłušeja, na wonym městnje we wobłuku adwentnički wo perspektiwach towarstwa bjesadowała. Při tym zwěsćichu, zo so přichodny čas generaciska změna zahaji.