Budyšin (SN/MWj). Zo móžeš sej w bibliotekach knihi, časopisy a druhe medije wupožčować, je powšitkownje znate. W Budyskej měšćanskej bibliotece maja wotnětka přidatny serwis. Pod hesłom „Symjo sej wupožčić – mnohotnosć žnjeć“ móža sej zahrodkarjo tam pisany wuběr wužitnych rostlin wotkryć.

Kaž měšćanske zarjadnistwo w nowinskej informaciji zdźěli, maja w bibliotece bohaty wuběr symjenja k dispoziciji. Mjez druhim su to tomaty „Pink Bumble Bee“, buny „Kentucky Wonder“, hroch „Kleine Rheinländerin“, čerwjena rěpa „Forono“ abo solotej „Maikönigin“. Symjenja najwšelakorišich kwětkow poskitk wudospołnjeja. Zaměr projekta je, stare družiny kulturnych rostlin zachować a tak mnohotnosć w našich zahrodach spěchować. Zdobom chce akcija wjeselo při zaběrje w zahrodce zesylnić a wuměnu mjez zahrodkarjemi přisporjeć.