Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow ­prócuja. K tomu ­přinošować chce naša serija z pokiwami z weterinarneje ­mediciny. (77)

Jónu zazwoni dźeń do patoržicy wobsedźer kruwow na mnje a rysowaše mi rozpjeršeny, zo je jeho najstarša kruwa ćeliła (kalben), ale njemóže wjace stanyć a što budźe nětko z ćelatkom ... Změrowach jeho a podach so na puć. Na małym sta­toku mje wobsedźer hižo wočakowaše. Cyle zmotany mi rjekny, zo drje to ničo wjace njebudźe. Přepytowach zwěrjo. Napadnej běštej lódzymnej wuši. Tež dalše indicije so k wobrazej chorosće hodźachu. „Jasny pad“, prajich, „Kruwa ćerpi pod ,mlokowej zymicu (Milchfieber)‘. ­Dóstanje kalcium a potom zaso steji.“ ­Direktnje přez žiłu dach infuziju z kal­ciumom pomału do kreje. Terapija njebě hišće cyle dokónčena, a hižo so kruwa zběhny. Wobsedźer njemóžeše so dodźiwać a bě pře wšu měru zbožowny.