Studijo Lucija serbske žiwjenje digitalizuje – tež to, štož ma křižer wědźeć

Budyšin (SN/lmc). Dypkownje k jutram je studijo Lucija minjene tydźenje wjacore wideja na digitalnej platformje Youtube wozjewiło. Mjez nimi je tež połhodźinski přinošk wo tym, „što dyrbi křižer wědźeć“. Wón pokazuje přihoty na jutrowničku a bazuje na nahrawanjach Pětra­ Zyndy z lět 2009 a 2010. Wot rjedźenja sedła přez přihotowanje konjow hač k prawemu připrawjenju wuzdy a sedła posrědkuje widejo, kelko dźěła za křižerstwom tči. Nimo praktiskich činitosćow so tež teoretiske aspekty kaž zestawa procesiona znazornjeja. Přinošk pokazuje, štož zdawa so zwonkastejacym často samozrozumliwe być.