Rakecy (JK/SN). Što je rozdźěl mjez popłatkom a kóštami? To chcychu wjacori čłonojo Rakečanskeje gmejnskeje rady na swojim zašłym posedźenju wědźeć. Nawodnica financneho zarjada gmejny Franziska Pfeiffer předstaji jim zakłady a pozadki nowych wustawkow wo kóštach wohnjoweje wobory. Stare wustawki z lěta 2003, w kotrychž bě so hišće wo popłatku za zasadźenja wohnjoweje wobory rěčało, njejsu hižo aktualne a njewotpowěduja sakskim předpisam. Nimo toho maja so kóšty w sakskich gmejnach po jednotnych směrnicach wobličić, zo bychu přirunajomne a transparentne byli.