Budyšin/Drježdźany (SN/hn). „Serbski forum wědy“ w Budyšinje, najwjetša inwesticija do narodneje infrastruktury Serbow, steji po měnjenju łužiskeje zapósłanče Franciski Schubert, frakciskeje předsydki a finančneje politikarki frakcije Zelenych w Sakskim krajnym sejmje, na hračkach. W aktualnej zdźělence je wona wotmołwu sakskeho statneho knježerstwa na jeje parlamentariske naprašowanje zjimajo konkluziju sćahnyła: „Je fatalne, zo so na substancy Serbskeho foruma wědy lutuje. To je centralny projekt 21. lětstotka za serbsku kulturu we Łužicy.“ Tak Schubert konkretne wotmołwy krajneho ministerstwa za infrastrukturu a wuwiće kraja interpretuje (w interneće pod „edas“ w ćišćence 6351 8. wólbneje periody sakskeho parlamenta přistupne).