Nalětnje wiki přirody w Stróži 4 500 wopytowarjow přiwabili

Stróža (CS/SN). Nalěćo je čas wusywanja a sadźenja. Čehodla do wulkeje kupnicy jěć, hdyž poskićuja na wikach přirody w Stróži pola Hućiny wudźěłki z regiona? Organizatorojo wikow su sobotu znowa dopokazali, zo je zarjadowanje přewšo woblubowane. Něhdźe 4 500 wopytowarjow je na areal wokoło Domu tysac hatow do Stróže přišło. 80 wikowarjow njeje na swojich stejnišćach jenož rostliny a symjo poskićiło, ale tež tójšto wudźěłkow wuměłskeho rjemjesła a kulinariske słódnosće, kotrež sy sej tež sobu wzać móhł. Nimo wikowarjow prezentowachu so zdobom towarstwa a institucije.