Sezonu při Slěbornym jězoru pod ćežkimi wuměnjenjemi zahajili

Łaz (AK/SN). Po saněrowanju južneho dźěla Slěborneho jězora poslednje dźěła na Bjedrichečanskim pobrjohu derje pokročuja. Tole zdźěli Łazowski wjesnjanosta Thomas Leberecht (CDU) na zašłym posedźenju gmejnskeje rady. „Naš plan, wšitke dźěła na pobrjohu kaž tež na promenadźe hač do kónca apryla zakónčić, móžemy dodźeržeć“, wón radźićelam rozłoži. Wot zašłeho tydźenja je kupanje we woznamjenjenych wobłukach Slěborneho jězora zaso dowolene. Za lětušu sezonu je Łazowska gmejna wot Budyskeho wokrjesa za to wuwzaćnu dowolnosć dóstała. Na to běchu so po dorěčenju ze Sakskim wyšim hórnistwowym zarjadom a z fachowcami za geotechniku dojednali.