Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow prócuja. K tomu přinošować chce naša serija z pokiwami z weterinarneje mediciny. (79)
Jatra su jedyn z organow cycakow, kotryž ma wjele wšelakorych nadawkow. Najčasćišo słyšiš, zo jatra jědojte maćizny w ćěle znješkódnjeja (Entgiftung), kaž alkohol abo ćěłu cuze maćizny. Jatra pak su mjez druhim tež składowanišćo witaminow abo glykogena (forma składowanja wuhlikowych hydratow). Wone produkuja wšelake tuki a bělkowiny, kotrež su we wšelakich kołoběhach metabolizma (Stoffwechsel) njeparujomne.
Poćerpje-li organ škody, so tón spěšnje regenerěruje. Tohodla njedóńdźe hnydom k wupadej funkcijow jatrow. Hakle, hdyž jatra 80 do 90 procentow swojeje funkcije zhubja, dóńdźe k njedostatkam w kołoběhach metabolizma, za kotrež su jatra sobu zamołwite.
