Wojerecy (AK/SN). Twar Wojerowskeho Nowoměšćanskeho foruma „Nikolai Ostrowski“ derje pokročuje. Na swojim zašłym posedźenju je měšćanska rada dalši nadawk za saněrowanje a rozšěrjenje zetkawanskeho a kubłanskeho centruma dźěći, młodostnych a swójbow přepodała. Rakečanske předewzaće Martin Stolle ma so wo wonkowne připrawy starać.

„Hruby twar je hotowy“, rozłoži planowar Thomas Gröbe. „Nětko je nutřkowny wutwar na rjedźe. Předwidźany pjenježny a časowy budget móžemy dodźeržeć.“ Hač do kónca tohole lěta ma Nowoměšćanski forum hotowy być. Spočatnje měješe projekt dźewjeć milionow eurow płaćić. Dokelž pak su zarjadowanje planetarija přidatnje zapřijeli, stupachu kóšty na 12,8 milionow eurow. Wosom milionow eurow dóstanu wot Zwjazka spěchowanych, 220 000 eurow přida Sakska. Wjace hač štyri miliony eurow dyrbi ­město Wojerecy same zapłaćić. Bywši młodźinski klubowy dom chcedźa přetwarić a pódlanske twarjenja rozšěrić. Za planetarij je nowotwar trěbny.