Hudźbne wuchodźowanje po Budyskim Tuchorskim kěrchowje

Budyšin (CS/SN). Njedźele maja w běhu cyrkwinskeho lěta wosebite mjena. Minjena njedźela mjenuje so „Kantate“, štož woznamjenja „spěwajće“. Tohodla je Evelyn Fiebiger zajimcow dźeń do toho na wuchodźowanje po Tuchorskim kěrchowje w Budyšinje přeprosyła. Woni móžachu sej na narownych kamjenjach noty a teksty kěrlušow wotkryć. Něhdźe 35 wosobow je namołwu sćěhowało a wjele noweho nazhoniło. Tež hudźba při tym zaklinča. Evelyn Fiebiger bě swój lěsny róžk sobu přinjesła, twarc dujerskich instrumentow Frieder Löbner pak swoju trompetu. We wobłuku dwě hodźinje ­trajaceho wuchodźowanja zanjesechu wobdźělnicy kěrluše a kanony.