Permakultura skići šansu za Łužicu, kotrejž hrozy suchota

Njebjelčicy (SN/MiR). Prěnje čitanje załožby Wnučkokmanosć w Njebjelčicach je 1. meje popołdnju wjace hač połsta zajimcow přiwabiło. Mjez nimi běchu tež hosćo, kiž su sej ze zdalenišich kónčin, ze srjedźneje Łužicy, z Podstupima, Mišnjanskeho kraja kaž tež z Hessenskeje do Njebjelčic dojěli. W prěnim rjedźe pak běchu do noweho zetkawanišća na kromje wsy domoródni kaž tež wědomostnicy, regionalni politikarjo, předewzaćeljo, wuměłcy a wosebje čłonojo załožby přišli. Dźěći a młodostni móžachu so tam runje tak wědy nasrěbać kaž dorosćeni wopytowarjo. Kathinka Neff, kotraž ze swojim mandźelskim Johannom prěni króć we Łužicy přebywaše, přednošowaše wo swojich nazhonjenjach we wobchadźenju z přirodu a wo nałožowanju permakultury za swójske zastaranje na swojim statoku w Grub zapadnje Bamberga. W prěnim rjedźe pak so wona wobchadźenju z wodu wěnowaše. Na naprašowanje z publikuma poruči, we Łužicy štomy sadźeć, zo njeby póda regiona přichodnje pod njeznjesliwej suchotu ćerpjeła.