Na prěnich Budyskich chlěbowych wikach so Worklečanska pjekarnja wobdźěliła
Budyšin (MČ/SN). Wóń čerstweho chlěba je wutoru syły ludźi do Budyskeho wikowanišća ECE přiwabiła. 5. meje, na dnju chlěba, su pjekarscy mištrojo z regiona ze swojimi sobudźěłaćerjemi pokazali, kak bohaty poskitk tohole pječwa je. Prěni króć su so ze swójskimi wudźěłkami na centralnym wikowanišću sprjewineho města prezentowali. Tole su mnozy wopytowarjo wužili. W cyłku su předewzaća hač do 30 družin chlěba a całtow napjekli a slědnym hubam poručeli. Wiki chlěba su so lětsa prěni króć wotměli, byrnjež pruwowanje najlěpšich družin chlěba kaž tež wosuška hižo dlěje do protyki nakupowanskeho centruma na Žitnych wikach zapisane było. Iniciatiwu za prěnje chlěbowe wiki je centerowy management wuwił. Budyske pjekarske zjednoćenstwo je poskitk a šansu wužiło, rjemjesło pječenja zjawnje sylnić. Aktualnje přisłuša tudyšemu zjednoćenstwu 36 pjekarnjow, spočatk 1990tych lět bě jich hišće wjace hač 80.
