Naši komunalni politikarjo maja so ze sćěhami zwjazkoweje politiki bědźić

Drježdźany/Njebjelčicy/Chrósćicy. (SN/jp). Na kongresu pěstowarnjow zašły tydźeń w Drježdźanach njejsu jeničce nowy kubłanski plan předstajili (SN su pjatk rozprawjeli). Sakski ministerski prezident Michael Kretschmer (CDU) je komunam zdobom wjac pjenjez za pěstowarnje přilubił. W zašłych 20 lětach su kóšty za pěstowarnje wo něhdźe dwě miliardźe eurow stupali. Skoro połojcu wšěch kóštow su komuny same přewzali. Aktualne finančne połoženje komunow je hustodosć katastrofalne. Deficit wučinja tuchwilu 1,03 miliardy eurow, to je w běhu lěta zwyšenje wo 50 procentow, kaž z ličbow Krajneho zarjada za statistiku wuchadźa.