Mjez 22 projektami aktualneho Leader-spěchowanja Europskeje unije w našich kónčinach je předewzaće w Chrósćicach. W měrcu je gremij towarstwa „Hornjołužiska hola a haty“ wo rozdźělenju regionalneho budgeta rozsudźił.

Chrósćicy. (SN/jp) Z pomocu spěchowanskich pjenjez ma so při bywšim twarjenju Chróšćanskeje šule nowy krosnowanski nastroj natwarić. Po informacijach wjesnjanosty Marka Klimana chcedźa tam pawk za krosnowanje nastajić. Jón móža dźěći z horta runje tak wužiwać kaž wjesne dźěći zwonka wotewrjenskich časow zarjadnišća. Tuž budźe to přidatny poskitk na dobro dźěći.

Na prašenje, hač z nowej hrajkanskej připrawu nowe zetkanišćo za dźěći a swójby nastanje, Marko Kliman wotmołwi: „Dokelž hrajkanišćo, na kotrymž ma krosnowadło stać, hižo eksistuje, njebudźe tule nowe zetkawanišćo. Ale wobstejace nabudźe nowu přidatnu atraktiwitu.“