Trjebin (AK/SN). Dom towarstwow a wokolne sportowe a wólnočasne připrawy w Trjebinje ludźo prawidłownje wužiwaja. To bě pozitiwna informacija w rozprawje wjesnjanosty Roberta Sprejza (njestronjan) na njedawnym posedźenju gmejnskeje rady. W twarjenju schadźuja so Trjebinske towarstwa kaž sportowe, žonjace a seniorowe, kaž tež tamniša ­Domowinska skupina. 5. meje wotmě so tam sportowy dźeń policije, dźeń pozdźišo sportowy dźeń towarstwow a 9. meje na sportnišću lětuše sakske krajne mišterstwo za małe polo Sakskeho koparskeho zwjazka za koparjow nad 60 lětami. 8. junija změja wosebity sportowy swjedźeń. „Na njón su so šulerjo ze sydom šulow a znajmjeńša 130 staršich přizjewili. Wočakujemy šule z Běłeje ­Wody, ze Zhorjelca a snano z Pólskeje“, rjekny Thomas Girbig, předsyda sportoweho towarstwa BSV Traktor Trjebin z.t. Te skutkuje wot decembra 2022 a jako naslědnik sportoweho towarstwa ST Fortuna Trjebin 1996 z.t. Mjeztym ma towarstwo BSV Traktor Trjebin z.t. 150 čłonow. Naměstnik předsydy Thomasa Girbiga je René Mettke. Dalši wjeršk w towarstwowym domje dožiwja zajimcy 17.