Na zarjadowanju Budyskeho zwjazka archiwow je Eberhard Schmitt připosłucharjow njedawno na putace pućowanje sobu wzał. Jako domizniski slědźer wěnuje so wón swědkam zašłosće w Budyšinje, na kotrež zwjetša lědma štó dźiwa.
Budyšin (CS/SN). Wobdźělnicy zarjadowanja su tójšto pozadkowych informacijow dóstali. Tuž drje w přichodźe ze skedźbliwišim wóčkom po sprjewinym měsće póńdu.
Dźensa pak wšitke wot Eberharda Schmitta fotografowane objekty hižo njewobsteja. Druhe buchu na wšelkich městnach při twarskich dźěłach wuryte a na te wašnje za našich potomnikow zachowane.
Tafla při Hartmannowym domje při Hłownym torhošću je so na přikład zhubiła. Na njej bě napisane, kotre sławne wosobiny běchu swój čas w domskim, w kotrymž je dźensa imobilijowe předewzaće Hornig zaměstnjenje, přebywali. To běštaj mjez druhim pruski kral Friedrich Wulki (1712–1786) a Napoleon Bonaparte (1769–1821).
Porno tomu bu wopomnjenski kamjeń při dubje krala Alberta na Hrodźišku w lěće 1945 wuchowany a steji nětko zaso na swojim městnje.
