Budyšin (CS/SN). Defibrilator móže kóždy lajk posłužować. Nastroj mjenujcy „rěči“ a podawa dokładne instrukcije, kak maš z nim čłowjekej pomhać, kiž je w nuzy. Runočasnje alarměruje aparat tak mjenowanych „wuchowarjow žiwjenja“. Po wšej Němskej je 52 000 wosobow jako tajkich registrowanych. Štóž z nich je pomocy potrěbnemu najbliže, dóstanje wotpowědny signal na swoje šmóratko. Paralelnje wołaja wuchowanske jězdźidło. Najwjetši wuznam pak maja prěni pomocnicy, přetož hdyž pola čłowjeka wutroba bić přestanje, we woprawdźitym zmysle słowa kóžda mjeńšina liči. Kóždu mjeńšinu mjenujcy šansa na přežiwjenje wo dźesać procentow woteběra. Jako ­Budyski wyši měšćanosta Karsten Vogt wčera na Hrodowskej tajki defibrilator zjawnosći přepoda, wón wšitkich wo­bydlerjow napominaše, druhim w nuznym padźe pomhać.