Na swojim wčerawšim wopyće w Ludowym nakładnistwje Domowina (LND) su so čłonojo přirady za serbske naležnosće města Wojerec tež z nowym serbskim społnomócnjenym Budyskeho wokrjesa Tomašom Korchom zetkali.

Budyšin (SN/mb). Prjedy hač je jednaćel LND Syman Pětr Cyž hosći oficielnje na sydarni do domu witał, su so z rumnosćemi a dźěławosću našeho wječornika zeznajomili. Při tym wodźeše šefredaktor Serbskich Nowin Marcel Brauman hosći Falka Hempela, měšćanskeho radźićela AfD we Wojerecach, wěcywustojneho wobydlerja Eugena Diesterhefta (CDU), Tomaša Korcha, społnomócnjeneho za serbske naležnosće Budyskeho wokrjesa, Evelin Graf, předsydku Wojerowskeje serbskeje přirady, Birgit Hančikowu, zamołwitu gremija za zjawnostne dźěło a regionalnu rěčnicu Domowiny, a Gabi Linakowu, naměstnicu předsydki serbskeje přirady a županku župy „Handrij Zejler“ (na wobrazu wotlěwa), na dźěłowe městno wuhotowarki layouta Jadwigi Šołćic (prědku na wobrazu).