Dźěwinska gmejna dyrbi krute předpisy za hospodarski plan dodźeržeć

Brězowka (AK/SN). Pjenježne połoženje Dźěwinskeje gmejny wostanje dale jara napjate. Gmejnska rada drje bě spočatk měrca hospodarski plan 2026 jednohłósnje wobzamknyła. Dohladowanski zarjad Zhorjelskeho wokrjesa pak jón njeschwali. Tole rjekny komornica Dana Piehl na zašłym posedźenju gmejnskeje rady. „Mamy problem z wudawkami. Ze swo­jimi planowanymi winowatosćemi njejsmy dźěłakmani“, wona podšmórny. ­„Jenož z krutymi předpisami wokrjesa móžemy swoje pjenježne połoženje polěpšić.“

Prěnje žadanje je, zo ma gmejna hospodarski strukturny koncept 2026 hač do 2029 dale wjesć a předźěłać. Dale ma Zhorjelski wokrjes přichodnje wšitkim wudawkam nad tysac eurami přihłosować. Dotalny hospodarski strukturny koncept předwidźi zalutowanja we wob­jimje 24 000 eurow. Mjez druhim maja 10 000 eurow za adwentnički wuměnkarjow zalutować, 4 000 eurow za prezenty rentnarjam a 1 200 eurow za abonement digitalnych nowinow přez komunu. Dale zalutuje Dźěwinska gmejna něšto wjace hač 5 200 eurow z nowym zrěčenjom za milinu.