Budyšin (CS/SN). Tomasz Nawka angažuje so hižo 33 lět čestnohamtsce jako předsyda towarstwa měšćanskich partnerstwow Budyšina. W tymle zastojnstwje koordinuje zhromadne dźěło z městami Heidelberg, Worms, Jelenia Góra, Jablonec nad Nisou a Dreux. Mjez druhim organizowaše prawidłowne zetkanja a zhromadne zarjadowanja ze zastupjerjemi partnerskich městow. Z tutych su wjelelětne přećelstwa wurostli. Partnerske towarstwo nominowaše Nawku tuž za wuznamjenjenje z čestnym woponom města Budyšin, a měšćanska rada jednohłósnje přihłosowaše.