Wojerecy (KD/SN). Strukturna změna ma we Wojerecach takrjec cyle nowe wobličo­. Tam pojědźe bórze šěsć nowych elektrobusow typa MAN Lion’s City E12C. Minjeny štwórtk su je před kulisu Hórnikečanskeje energijoweje fabriki přepodali. Kaž statny sekretar w sakskim ministerstwje za infrastrukturu Sören Trillenberg rjekny, „nastawa w měsće moderny paket z jězdźidłami, nabiwanskej infrastrukturu, zamkarnju a inteligentnym wodźenjom wobchada“.

Z dwanaće metrow dołhimi busami, kóždy z 80 městnami za sedźenje a staće, městnomaj za chorobny stoł, klimowej připrawu a ćopłotnej klumpu, chcedźa sej nowych sobujěducych zdobyć a lěpše zwiski k turistiskim a ke kulturnym cilam zmóžnjeć. Wot kónca julija pojědu nowe jězdźidła po pjeć měšćanskich čarach. Kóždy bus móže hač do 250 kilometrow daloko jěć. Na to dyrbi tři a poł hodźiny swoju bateriju nabić. Šoferow busow a sobudźěłaćerjow zamkarnje „nětko za nowe jězdźidła wukubłuja“, rozłoži jednaćelka Wojerowskeje wobchadneje towaršnosće Sandra Trebesius.