Bukecy (JKr/SN). Hižo třeći raz přeprosyštej minjenu sobotu Bukečanska bjesada a Kulturu spěchowace towarstwo w Bukecach na mejski swjedźeń. Z farskeho dwora přićahny wot skupiny Serbska reja přewodźeny ćah žonow a holcow w drasće ewangelskich Serbow Budyskeho kraja. Jim běchu so lětsa prěni raz serbšćinarki a serbšćinarjo zakładneje šule přidružili. Hižo jako sej holcy na farje serbsku drastu woblěkachu, zynčeše w domje z luteje napjatosće, wćipnoty a hordosće kaž w kołću. Wšako běchu dźěći zhromadnje ze swojej wučerku Luizu Šadec w minjenych tydźenjach pilnje reje za mejski swjedźeń zwučowali.

Zo njezamóža dźěći jenož „Šewca“ abo „Hanumarju“ rejować, ale samo koło teptać, pokazachu potom zhromadnje z holcami a žonami na dworje „Wjesneje hospody“. Dujerjo Bukečanskeje wosady a Serbska reja jich přewodźachu a nahladna ličba serbskich a němskich hosći jich spěwajo podpěraše. Mjez jednotliwymi rejemi wosadny farar Thomas Haenchen a Hanaróža Šafratowa wo mejemjetanju­ powědaštaj.