Běła Woda (SN/MWj). Z njewšědnym kriminalnym padom, kiž zdaše so hižo wotzamknjeny być, zaběra so tuchwilu policija w Běłej Wodźe. Při tym jedna so wo morjenje, kotrež bě so před 15 lětami stało. K tomu ma policija prašenja, při kotrychž wujasnjenju móhli wobydlerjo snano pomhać, kaž Zhorjelska policajska direkcija zdźěla.

Što bě so stało? W rańšich hodźinach 29. meje 2011 přizjewi so tehdy 58lětny Hans-Joachim B. pola policije a zdźěli, zo je swoju mandźelsku Bärbel B. zabił a zo móža jeho na Luxemburgowej w Běłej Wodźe zajeć. Policisća namakachu žonu z ćežkimi zranjenjemi, zawinowanymi po wšěm zdaću z ćěsliskim hamorom. Ju dowjezechu do chorownje, hdźež wona něšto dnjow pozdźišo zemrě. Morjenja dla zasudźi Zhorjelske krajne sudnistwo Hansa-Joachima B. 26. apryla 2012 k pjeć lětam jastwa. Kak je so njeskutk stał, je hač do dźensnišeho njejasne, přetož zasudźeny­ so pječa na ničo dopominać njemóžeše. We wobłuku přepytowanjow policije a tež sudniskeho jednanja wón ničo njerjekny.