Budyšin (SN/bn). Posledni raz w aktualnej hrajnej dobje je Serbski ludowy ansambl sinfoniski koncert wuhotował. Porno předchadźacym třom koncertam wzdachu so tónraz wosebiteho hesła, štož pak njebě minjenu njedźelu jenička překwapjenka něhdźe 40 wopytowarjam. Poprawom dźe chcyše Serbska komorna filharmonija suitu „Ze serbskeje zemje“ Bjarnata Krawca předstajić, štož pak dosć njewšědneje přičiny dla móžno njebě. Pruwujo transkripciju originalneho rukopisa za nowu, orchestrej SLA přiměrjenu partituru bě so mjenujcy někotražkuli zajimawostka wujewiła, kotraž sej dokładnu analyzu žada, kajkaž twori w muzikologiji zakład tak mjenowaneje kritiskeje rozprawy. A wědomostna akuratesa sej tohorunja tójšto žada, znajmjeńša a najčasćišo čas. Twórba zaklinči tuž pozdźišo, dokładny termin hišće jasny njeje.