Hodźijska wosada přihotuje 950. róčnicu swojeho Božeho domu

Hodźij (GK/SN). Hodźijska wosada spomina lětsa na swoje załoženje před 950 lětami, jako bu přez Mišnjanskeho biskopa Bena w lěće 1076 prěnja kamjentna cyrkej jako předchadny twar dźensnišeho Božeho domu ze swojimaj wěžomaj natwarjena. Hodźij bě z tym jedna z najzažnišich wosadow w jadrowym kraju kmjena Milčanow a jako prafara wuchadźišćo za misionowanje hišće w dalokej měrje pohanskich Serbow. Dalše prafary běchu mjez druhim Budyšin, Ketlicy a Jawornik pola Zhorjelca. Hodźijska prafara wupřestrěwaše so při tym na juhu hač k Łužiskim horam, na sewjeru hač k holi a mjezowaše na zapadźe na Biskopicy.

Z misionowanjom Milčanow natwarichu so we wulkej prafarje w běhu lětstotkow na knjejstwowych sydłach najprjedy kapałki a pozdźišo cyrkwje. Spočatnje běchu to wot Hodźija wobstarane filialne cyrkwje. Prěnjej z nich nastaštej w Njeswačidle a Husce.