Hanka Rjelcyna a Monika Auer šěritej wědu wo wosebitosćach regiona

Zły Komorow (SN/MiR). Bajkarka Monika Auer ze Złeho Komorowa a zamołwita za naležnosće Serbow we wokrjesu Hornje Błóta-Łužica (OSL) Hanka Rjelcyna stej němskorěčny projekt ze serbskim wobsahom wuwiłoj. Pod hesłom „Wie der Wassermann in die Schwarze Elster kam“ posrědkujetej wonej šulerjam tamnišich zakładnych šulow wědu wo Serbach. „Dźěći wědźa rozdźělnje wjele wo Serbach w swojim žiwjenskim wobswěće“, Hanka Rjelcyna wuswětluje, „tuž po­srědkujemy zakładne informacije.“ Při tym hraja mjez druhim wjesne a městne tafle wažnu rólu. Dotal je jimaj jenički króć šuler rjekł, zo měješe zapřijeće pod němskim mjenom města abo wsy na taflach za pólske. Druhim dźěćom scyła wědome njebě, zo tam nimo němskeho tež napis w druhej rěči steji. Dotal su zakładne šule w Złym Komorowje, Čornym Gózdźe a Łuchowje poskitk přiwzali, dalše maja wotpohlad to činić.