Pavel Kuča Łužicu z nowymi družinami rostlin wobohaća

Praha/Ralbicy/Róžant (SN/LuNo). Pavel Kuča ma wosebity konik: Rady swojim serbskim přećelam sadźenki sadowych štomow a wina wozy. A to družiny, kiž w Serbach dotal njerostu. Sam je na jich zahrodach wosadźa chiba přećelam poruči, kak maja to sčinić, a jenož hdys a hdys na kontrolu přijědźe. Potom dyrbi na přikład winicu pola Krawcec swójby na kromje Ralbic wobrězać. Před lětomaj je Kuča w samsnej wsy w směrje do Koslowa z Robertom Krawcom aleju jědźnych kastanijow připrawił. „Wjeselu so, zo njebudźe dołho trać, a ludźo w Delanach smědźa w mokrozymnych adwentnych dnjach swoje prěnje, wuběrne pječene kastanije jěsć“, Kuča měni. Něhdźežkuli w Serbach so mjeztym hižo nad słódkimi płodami wjesela, wšako su nowe figowcy loni prěnje płody njesli.