Radwor (SN). Na gmejnskej radźe zawčerawšim w Radworju informowaše tam­niša wjesnjanostka Madeleine Rynčowa (Minakałske wolerske zjednoćenstwo) radźićelow a přitomnych wobydlerjow wo podawkach w gmejnje. Wona skedźbni mjez druhim na tuchwilne awkcije. Tak da gmejna w Kamjeničanskim awkciskim domje wšelake nastroje a graty přesadźować. „Dokelž mamy dwě nowej wohnjowobornej awće njejsu wěste dźěle hižo trěbne“, wona wujasni. Tež někotre do­trjebane mašiny twarskeho dwora su w awkciskim domje na předań. „Wšitko je z prawniskim a komunalnym zarjadom wothłosowane“, wona zwurazni.

Prjedy hač radźićeljo wo dalšich naprawach w gmejnje wothłosowachu, dyrbjachu personalnej změnje w gremiju přihłosować. Gmejnski radźićel Cyril Hančik je próstwu zapodał swój mandat złožić. Powołanska situacija jemu hižo znjemóžni zastojnstwo wukonjeć. Za serbske wolerske zjednoćenstwo je Bianka Šeferowa mandat zawčerawšim přewzała.