Budyšin (SN/MWj). Dołha nóc kultury wotměje so jutře, sobotu, znowa w Budyšinje. Wot 17 do 22 hodź. wotewri 17 kulturnych partnerow swoje domy a zarjadnišća a přeprošuje na zhromadny wječorny program. Kmótřistwo za Dołhu nóc kultury přewzał je wyši měšćanosta Karsten Vogt. Mjez wobdźělenymi zarjadnišćemi su Serbski ludowy ansambl, Němsko-Serbske ludowe dźiwadło, tachantska cyrkej swj. Pětra, Muzej Budyšin, Kamjentny dom hromadźe ze Serbskim institutom, dźěłarnja Dźěłań dźeń a Thespis-centrum. Zajimcy móža sej za 7 eurow (potuńšene 3 eura) zastupny banćik kupić, kotryž za wšitke zarjadowanja płaći. Dźěći hač do dwanaće lět maja darmotny zastup.