Florian Heilbronner Radworski hród přikładnje ponowja a restawruje

Radwor (SN/BŠe). Kuratorka Němskeje załožby za pomnikoškit (DSD) za Budysku kónčinu Christa Kämpfe je wčera wobsedźerjej Radworskeho hrodu Florianej Heilbronnerej bronzowu taflu z napisom „Spěchowane wot Němskeje załožby za pomnikoškit z pomocu loterije Spirala zboža“ přepodała. Z tym hódnoći jeho wosebity angažement. Zdobom ma plaketa dalšich darićelow k podpěrje pozbudźować. Dźakowano mnohim pjenježnym daram kaž tež z wunoškow loterije je załožba restawrowanje jědnaće woknow hrodu zmóžniła. Pjeć woknow je po wšěm zdaću z časa wokoło 1700. „Hdyž stejimy před tajkim objektom a widźimy, što je z njeho nastało, je to wšeje česće hódne“, kuratorka zwurazni. Hladajo na Radworski hród jednaše so spočatk 2020tych lět wo „Pomnik w nuzy“. „Trjebachmy někoho, kiž ma zmužitosć a móc něšto zeskutkownić“, Christa Kämpfe wuzběhny. Florian Heilbronner bě jónkrótnosć objekta spóznał. „Zmužitosć je sej wón hač do dźensnišeho wobchował“, wona wčera podšmórny.