Budyšin (CS/SN). Zahrodkarjo a dalši wobsedźerjo ležownosćow maja druhdy swoju nuzu z njeprošenymi wopytowarjemi. Přetož tež w městach kaž Budyšinje su so dźiwje zwěrjata zasydlili, kotrež pytajo za picu škodu naparaja. Budyscy měšćanscy hajnicy Werner Winde, Steffen Reitzig a Rene Harzer rozprawjachu předwčerawšim wo swojoraznosćach dźiwich zwěrjatow, kotrež w Bu­dyšinje wuhladaš a podachu pokiwy, kak z nimi wobchadźeć. Na derje wopytane zarjadowanje bě zapósłanc Sakskeho krajneho sejma Marko Šiman (CDU) přeprosył.

Steffen Reitzig předstaji dźiwje zwěrjo, kotrež so w Budyšinje najčasćišo jewi, a rozłoži jeho wosebitosće: Liška je jako prěnja do města přišła. Wona wšitko žerje, je w nocy aktiwna a so čłowjeka zdaluje. Sorny skerje na kromje města wuhladaš. Wone so wokolinje přiměrja a su zwjetša same po puću. Škodu načinjeja z tym, zo hałžki štomow wotžeru. Dźiwje swinje su jara socialne zwěrjata. Tež wone so čłowjeka zdaluja, přeborkaja pak zemju, hdźežkuli su.