Naprawy přećiwo horcoće su tele dny za wšitkich ludźi přewšo wažne

Budyšin (SN/MiR/jp/BŠe). 20, 30 a 40 – ně, to njejsu hódnoty za honjenje w škoće, ale temperatury, kotrež tele dny knježa. Předewzaća su namołwjeni, swojich sobudźěłaćerjow při spjelnjenju dźěłowych nadawkow před horcotu škitać. „Je samozrozumliwe, zo na swojich přistajenych dźiwamy“, tak mějićel třěchikryjerstwa Krystof Hrjehor, kotryž ma twarske nadawki tuchwilu předewšěm we Łužicy. „Z dźěłom započinamy tež tele dny kaž zwučene rano w štwórć na sydom. Přewostajam swojim sobudźěłaćerjam rozsud, kak dołho woni při tuchwilnej horcoće dźěłaja a hdy swoje dźěło zakónča“, Konječan rjeknje. Přistajeni móža sej wosebje lochku dołhu drastu woblěkać, kotruž jim firma přewostaja. Zwjetša pak su třěchikryjerjo w T-shirće. „Jasna wěc, zo přewostajamy jim stajnje dosć wody k piću a słónčnu kremu. Woboje sej rano na twarnišća sobu bjeru.“