Zhorjelc (SN/MiJ/LiH). Astrocentrum Łužica (DZA) chce swój zwisk z Łužicu dale skrućeć a je tuž regionom wotpowědne idejowe wubědźowanje přewjedł. Pod hesłom „Zhromadnje perspektiwy tworić – my, Łužica a DZA“ běchu wobydlerki a wobydlerjo, iniciatiwy, towarstwa, kubłanišća a dalši akterojo z regiona přeprošeni, kreatiwne projektowe ideje zapodać. Hižo tři lěta je DZA we Łužicy aktiwny a so dale wuwiwa. Slědźenišćo nochce so jenož z wědomostnej inowaciju zaběrać, ale z projektom aktiwnje k wuwiću kónčiny přinošować. W srjedźišću steji při tym zhromadne dźěło z ludźimi na městnje. Tuž pytachu za idejemi, kotrež pokazuja, kak hodźi so slědźenišćo sylnišo z regionom zwjazać a kotre projekty móža změnu strukturow pozitiwnje wobwliwować. Dale běchu zamołwitym DZA inowatiwne perspektiwy wažne, kotrež wědomosć, towaršnosć a regionalne wuwiće mjez sobu zwjazuja.