Budyšin (SN/jp/BŠe). Kónc junija bu w Budyšinje Šćežka bajow wotewrjena. Minjenu sobotu wječor něhdźe w 21.40 hodź. su njeznaći postawu wowki lutkow z wnučkom na Budyskich Žitnych wikach z čerwjenej barbu namórali. Něhdźe poł hodźiny po tym Budyske měšćanske zarjadnistwo wo njeskutku zhoni. „Budyska Šćežka bajow je žiwa wot interakcije a hosćo kaž tež wobydlerjo sprjewineho města ju jara derje přijimuja. Wothłós je dotal jenož pozitiwny. Nětko zwěsćene móranja njemjerzaja jenož organizatorow, ale tež ludnosć“, nowinska rěčnica města Budyšina Josephine Brinkel na naprašowanje zdźěli. „Pad bu nam tež přez socialne syće přizjewjeny. Nadźijamy so, zo k dalšim móranjam njedóńdźe“, wona zwurazni.

Tež wotrjadnica hospodarskeho spěchowanja města Budyšin Doreen-Charlotte Hantschke je rozhorjena. „Móranja su škoda a zawostajeja špatny wobraz“, wona wuzběhny. Hantschke sej přeješe, zo so figura spěšnje zaso wurjedźi. Na tym bě tež Budyske měšćanske zarjadnistwo zajimowane. Mjeztym je postawa zaso čista.