Łaz (AK/SN). Hospodarske połoženje Łazowskeje gmejny je dale přewšo napjate. „Prěni raz so nam njeje poradźiło, swoje kredity kaž předwidźane wotpłaćić. Tuchwilu mamy mjenje dochodow hač wudawkow“, rozłoži komornica Mandy Liepert na zašłym posedźenju gmejnskeje rady. Radźićeljo wobzamknychu hospodarski plan 2026. Deficit wučinja cyłkownje 425 000 eurow. Tuchwilu liča z 1,12 milionomaj eurow mjenje přemysłoweho dawka hač hišće loni.

Łazowska gmejna dóstanje lětsa 1,6 milionow eurow klučowych připokazanjow wo Sakskeje. To je 287 000 eurow mjenje hač loni. „Dyrbimy so tuž na swoje winowatostne nadawki koncentrować“, praji wjesnjanosta Thomas Leberecht. Sobu najwjetše poćežowanje je wokrjesny wotedawk, kiž wučinja lětsa 2,013 miliony eurow. Loni bě to hišće 1,973 miliony eurow. Tež kredit, z kotrymž su 1994 a 1995 komunalne bydlenja saněrowali, gmejnu dale poćežuje.