Za Radworski hród nastawatej skulpturje jeničce na zakładźe fotow

Radwor/Cunnersdorf (UM/SN). W zwisku z ponowjenjom Radworskeho hrodu zhotowja wuměłska socharka Anna Lange w swojim ateljeju w Cunnersdorfje tuchwilu kamjentnej postawje Minerwu a Fortitudo. „Figurje při zachodźe hroda buštej w 1960tych lětach wotbitej, hačrunjež běštej tehdy hišće dospołnje zdźeržanej“, powěda mějićel hrodu Florian Heilbronner. Hdźe stej po tym wostałoj, njeje znate. Jenož fotografije pokazuja, kak stej něhdy wupadałoj. Z tym wostanje wězo wjele nadrobnosćow zakrytych. To pak ma tež lěpšiny. „Tale wobstejnosć skići mi wjetšu wuměłsku swobodu, hač hdy by wšitko dokładnje dokumentowane było“, praji Anna Lange.