Jubilej Budyskeju serbskeju šulow ma šulerjam hódnotu kubłanišća zbližić

Budyšin (SN/MiR). Budyska Serbska zakładna kaž tež wyša šula woswjećitej lětsa 80. jubilej swojeho wobstaća. Wot 28. septembra hač do 2. oktobra so wučerjo a šulerjo tutej róčnicy wěnuja. Hłownu zamołwitosć za projektowy tydźeń na zakładnej šuli ma wučerka Mónika Kolcowa. Wona je swoje powołanske skutkowanje runje na tutej šuli před lětami jako referendarka zahajiła a so po wuspěšnym zakónčenju studija na Lipšćanskej uniwersiće zaso sem nawróćiła. „Hdyž na podpěru swojich kolegowkow a kolegow w šuli kaž tež w horće šule myslu, mam jara dobre začuće nastupajo přihoty na jubilej. Zdobom wjeselimy so nad dobrym zwiskom z wyšej šulu, wšako zhromadnje z njej na podawk załoženja kubłanišća zhladujemy“, Mónika Kolcowa powěda.

Šuli wuhotujetej zakónčace zhromadne zarjadowanje, kotrež tuchwilu přihotujetej. Amtěrowaca šulska nawodnica Andrea Rätzowa je swojej koleginje hišće poboku. Kónc tohole měsaca pak wona swoje pedagogiske skutkowanje zakónči.