Dobry wothłós na awtonomne jězdźenje při Bjerwałdskim jězoru

Klětno (AK/SN). Wot lěća 2025 jězdźi awtonomnje jěducy mały bus w Hamorskej gmejnje wobstajnje wot Klětnjanskeho dwórnišća hač k Bjerwałdskemu jězorej a wróćo. Pilotowy a slědźerski projekt Drježdźanskeje techniskeje uniwersity wuspyta awtomatizowane jězdźenje pod wuměnjenjemi reality. Projektowej partneraj stej wobchadny zaměrowy zwjazk ZVON a Fraunhoferski institut.

Po jednym lěće zwěsćeja zamołwići nětko přewažnje pozitiwnu bilancu. Při tym zepěraja so na naprašowanja sobu jěducych a domjacnosćow. Wo tym rozprawjeja wědomostnicy w Hamorskej gmejnskej nowinje. „Po starće w juliju 2025 je shuttle wjace hač 600 sobujěducych wozył a wjace hač 3 000 kilometrow jěł“, rěka facit. Zasadnje, tak w zjimanju dale pisaja, su mnozy wobydlerjo a wopytowarjo za projekt. Mnozy maja na te wašnje prěni raz kontakt z nowej móžnej technologiju zjawneho bliskowobchada.