Młodostni w prózdninskim lěhwje medije nałožować nawuknyli

Harrachov. Z pućowanskimi črijemi, šmóratkami a wjele wćipnotu we wačoku je so 20. julija 27 młodostnych na puć do Harrachova podało. Přewodźałoj staj jich kubłarjej Tomaš a Diana Šołćic. Tež šulska psyca Sliva bě sobu. Hač do 26. julija wočakowaše skupinu w čěskich Kyrkonošach wotměnjawy tydźeń, w kotrymž mějachu rěč, přiroda, medije a zhromadne dožiwjenja w srjedźišću stać.

Ćežišćo bě kreatiwny a produktiwny wobchad ze šmóratkom abo tabletom. We wjacorych dźěłarničkach zaběrachu so młodostni z fotografiju, stop-motion-techniku a produkciju widejow. Při tym zeznajomichu so mjez druhim z programomaj Canva a Stop-Motion-Studio. W srjedźišću steješe wažne nazhonjenje: Šmóratko je wjele wjace hač hrajka abo nastroj za přistup do socialnych syćow. Prawje zasadźene je wone mnohostronski grat za kreatiwne ideje.