Strowota njeje samozrozumliwa. Kóždy je wjesoły, hdyž je strowy. Što pak móžeš za swoju nju činić? Z tym zaběra so serija Serbskich Nowin, za kotruž wjacori awtorojo pisaja. (8)

Krasna žołće kćějata rěpnica (Nachtkerze) njeje jenož wosebje rjana ze swojimi wulkimi štyrjomi łopješkatymi kćenjemi. Jeje rozkćěće móžeš direktnje wobkedźbować. Wječor před zaćmićom wuwiwa so z nabubnjeneho pupka krasne kćenje z dołhimi próškowymi nitkami, kotrež wabi wosebje insekty přez nóc. Kćenje pak je jenož krótko žiwe. Na přichodnym dnju wone dopołdnja hižo zwjadnje.

Rěpnica je dwulětna. W prěnim lěće widźiš jenož k zemi přiležacu łopjenowu rozetu. Ju spóznać žada sej trochu zwučowanja. W druhim lěće wuwiwaja so potom stołpik a kćenja a rostlina docpěje wysokosć něhdźe 50 centimetrow. Radźu, zo so njech najprjedy z kćějacej rostlinu zeznajomniš a so hakle přichodne lěto na samsnym městnje za rěpnicowymi rozetami rozhladuješ.