Wochozy (AK/SN). We Łužiskim parku błudźenkow we Wochozach prócuja so zamołwići dale wo to, zo móža tež zbrašeni wopytowarjo park bjez zadźěwkow wužiwać. Na hrajkanišću maja nětko nuznik, kotryž móža tohorunja ludźo z ćežkim zbrašenjom wužiwać. Nuznik je z hladanskim łožom wuhotowany, kotrež móžeš po wysokosći rozdźělnje nastajić. Dale maja tam tak mjenowany lifter. Z tajkimi nastrojemi nuzniki za zbrašenych hewak wuhotowane njejsu. „Tónle poskitk měri so na ludźi, kotřiž trjebaja při wužiwanju nuznika abo při pjelchowanju podpěru druhich“, rozłoži jednaćelka Anita Schwitalla. „Za mnohich potrjechenych a jich přiwuznych je tajke wuhotowanje často rozsudne, hač móža so scyła na dlěše wulěty podać a turistiske poskitki wužiwać.“ Kaž Anita Schwitalla dale podšmórnje, je park błudźenkow městno wočerstwjenja za wšitkich. Tohodla tam wobstajnje na tym dźěłaja, zo najwšelakoriše zadźěwki wotstronja.