Gmejna Bóšicy a dźěłarnistwo wumjetujetej mějićelej wotpohlad

Bóšicy (SN/StŠ). Narěčiš-li Bóšičana Stanija Ryćerja na Wětrowsku šamotownju, chce so jemu smjeć a płakać, wón praji. Wšojedne hač jako wjesnjanosta abo jako wobydler gmejny Bóšicy – kónc produkcije w tamnišim zawodźe je po jeho měnjenju woprawdźity skandal.

„Ta cyła wěc bě wot wšeho spočatka jasna“, Stani Ryćer rozhorjeny powěda. „Magnesita je Wětrow kupiła, zo by jón pomału, ale wěsće zawrěła.“ Samsneho měnjenja je tež dźěłarnistwo za hórnistwo, chemiju a energiju IGBCE. Rěčnik za Hornju Łužicu, Klaus Wirth, dźe samo hišće krok dale a praji: „Wšitcy su wot wšeho spočatka mjenje abo bóle wědźeli abo widźeli, kotru strategiju awstriska holding z Wětrowom sćěhuje. Tola nichtó njeje ničo přećiwo tomu činił. A nětko je přepozdźe.“

Sta ludźi, wosebje z wokolnych wsow, su lětdźesatki we Wětrowskej šamotowni dźěłali. Jako bě mějićel RHI Magensita loni w aprylu wozjewił, zo so zawod zawrěje, měješe tam nimale hišće 200 ludźi swoje dźěłowe městno